Британия қироллиги тахтига навбат бўйича иккинчи даъвогар шаҳзода Уильям ва унинг турмуш ўртоғи – Кембридж герцогиняси Кейтнинг иккинчи фарзанди – малика Шарлоттанинг суратлари илк бор оммага намойиш этилди. ТАССнинг хабар беришича, ҳали бир ойлик ҳам бўлмаган чақалоқ суратлари шанба куни Кенсингтон саройи томонидан эълон қилинди.
Герцоглар расмий қароргоҳининг тасдиқлашича, суратлар маликанинг онаси томонидан суратга олинган. У май ойи ўрталарида Сандрингемдаги мулкда ҳордиқ чиқараётганида, ўғли ва қизини биргаликда суратга туширган.
Суратда 22 июль куни икки ёшга тўладиган шаҳзода Жорж чап қўли билан синглисини оҳиста ушлаб тургани, малика эса оппоқ ёстиқда ётганини кўриш мумкин. Суратларнинг бирида эса Жорж синглисининг пешонасидан ўпиб қўяётгани тасвирланган
Шарлотта Елизавета Диана 2 май куни Лондондаги Авлиё Мария шифохонасида дунёга келди. Унинг биринчи исми бобосининг исми – шаҳзода Чарльзнинг қизларга мўлжалланган кўриниши бўлиб, иккинчи исми эса катта бувиси – қиролича Елизавета II шарафига, учинчи исми марҳум бувиси – Уэлс маликаси Диана шарафига қўйилган.
Шарлотта бобоси шаҳзода Чарльз, отаси шаҳзода Уильям ва акаси Жорждан сўнг Британия қироллиги тахтига тўртинчи даъвогар бўлди. Маликани чўқинтириш маросими 5 июль куни бўлиб ўтади.
Изоҳ (0)