Besh nafar olim “Osiyo Nobel mukofoti”ni qo‘lga kiritdi

5 nafar olim nufuzli “Shao Prayz” mukofotini qo‘lga kiritdi. Mukofotni 2002-yilda gonkonglik multimillioner va mediamagnat Shao Ifu ta’sis etgan, deb xabar qiladi “TASS”.

Astronomiya sohasidagi mukofot NASA’ning Eyms tadqiqotlar markazida ishlovchi Uilyam Borukiga berildi. U Yer kabi sayyoralarni qidirishga mo‘ljallangan “Kepler” kosmik teleskopi bilan ishlovchi yetakchi tadqiqotchilardan biri hisoblanadi.

Tibbiyot sohasidagi mukofotni Prinstondan Bonni Bessler va Vashington Universitetidan Piter Grinberga qo‘lga kiritdi.

Matematika sohasida germaniyalik Gerd Foltings va uning amerikalik hamkasbi Xenrik Ivanyets qayd etildi. Ular sonlar nazariyasining yangi usullarini o‘ylab topdi, bu esa matematika sohasida uzoq vaqtdan beri yechilmay kelayotgan muammolarni hal qilishga olib keldi.

“Shao Prayz”ning pul mukofoti har bir soha uchun 1 million dollarni tashkil etadi. Laureatlar pul mukofotini teng bo‘lishib oladi. Taqdirlash marosimi 24-sentabr kuni Gonkongda bo‘lib o‘tadi.

Mukofot tarixida hozirgacha 65 ta olim taqdirlangan. Uning asoschisi Shao Ifu 2014-yilda 106 yoshida vafot etdi.