ZiyoNET ta’lim tarmog‘ining “O‘zbekistonning madaniy merosi” bo‘limida “O‘zbekistonning yetti mo‘jizasi”ni aniqlash bo‘yicha o‘tkazayotgan aksiyasi davom etmoqda, deb xabar beradi ZiyoNET Resurs markazi axborot xizmati.
Oldinroq “O‘zbekistonning yetti mo‘jizasi” aksiyasi uch bosqichda o‘tkazilishini xabar qilgandik.
Obyektlar uchun ovoz berish chegaralanmagan, faqatgina bir kecha-kunduzda bir marta ovoz berish mumkin. Ovoz berish natijasidan oldin mintaqaviy mo‘jizalar, undan keyin “O‘zbekistonning yetti mo‘jizasi” aniqlanadi.
Har bir taklifga kiritilgan obyekt va u bo‘yicha materiallar barcha manbalar orqali tekshiriladi hamda internet materiallari bilan solishtiriladi.
Aksiya boshlangandan buyon juda ko‘p qiziqarli obyektlar taklifi kiritildi. Uchquduq—Nukus avtomobil yo‘li yaqinidagi Jaraquduqdagi “Tosh o‘rmon”, qadimiy odamning 50 ming yillik qoldiqlari topilgan Chorvoq suv ombori yaqinidagi Obirahmat qoyasi, Qoraqalpog‘iston cho‘llaridagi Chilpiq qal’asi, Xorazmdagi “Qo‘yqirilgan qal’a” astronomik inshooti, Navoiy shahri yaqinidagi Sangijumanda hatto yosh bola ham bir barmog‘i bilan qimirlatib yuborishi mumkin bo‘lgan 300 tonna keladigan qimirlovchi tosh va yo‘qolib ketgan deb hisoblangan noyob nok daraxtlarini bunga misol qilib keltirish mumkin.
Hozirgi kunda ZiyoNET ta’lim tarmog‘ining “O‘zbekiston madaniy merosi” bo‘limida 240 dan ortiq obyektlar to‘g‘risida ma’lumotlar joylashtirilgan.
Izoh (0)