Xitoy hukumati amaldorlar va ularning oila a’zolari uchun mahalliy qamoqxonalarda sayrlar tashkil etmoqda. “TASS”ning xabar berishicha, ushbu chora korrupsiya sabab qamalgan sobiq hamkasblari bilan ko‘rishgan ozodlikdagi amaldorlar bunday qilmishlar qanday oqibatlarga olib kelishi mumkinligini yaxshiroq his qilishlariga yordam beradi.
Xususan, Xubey viloyatidagi Shiyan shahrida may oyida partiya yetakchilari, davlat amaldorlari va ularning turmush o‘rtoqlari – 70dan ortiq kishi tarbiyaviy chora sifatida korrupsionerlar uchun mo‘ljallangan mahalliy qamoqxonaga tashrif buyurib, bir kunni shu yerda o‘tkazishgan. Bunday ekskursiyalarning so‘nggisi o‘tgan hafta oxirida tashkil etildi.
Ma’lumot uchun, Xitoy hokimiyati tepasiga 2012-yil oxirida Si Szinpin boshliq rahbarlarning “beshinchi avlodi” kelganidan so‘ng korrupsiyaga qarshi kurash sezilarli faollashdi. Hozirgi vaqtda viloyat yoki vazir rahbari darajasidagi 100dan ortiq yuqori martabali amaldorlar korrupsiyada gumon qilinib, yo javobgarlikka tortilgan, yoki tergov qilinmoqda. Ular orasida Xitoyning sobiq jamoat xavfsizligi vaziri Chjou Yunkan ham bor.
Izoh (0)