“Tafakkur o‘yinlari” filmida gavdalantirilgan olim Jon Nesh avtohalokat qurboni bo‘ldi

Amerikalik matematik olim, Nobel mukofoti sovrindori kichik Jon Forbs Nesh va uning rafiqasi Alisiya avtohalokatga uchrab, vafot etdi, deya xabar bermoqda The Washington Post. Er-xotin o‘tirgan taksi Nyu-Jersida YTHga uchradi. Olim 86, rafiqasi 82 yoshda bo‘lgan.

Iqtisodiyot bo‘yicha Nobel mukofotini Nesh 1994-yilda “Nokooperativ o‘yinlar nazariyasidagi muvozanat tahlili” ishi uchun qo‘lga kiritgan edi. 2015-yilda esa Jon Nesh chiziqli bo‘lmagan differensial tenglamalar nazariyasiga qo‘shgan hissasi uchun matematika bo‘yicha oliy mukofot — Abel mukofoti bilan taqdirlangan edi.

Keng jamoatchilikka Nesh ilmiy muvaffaqiyatlaridan ko‘ra, “Tafakkur o‘yinlari” (A Beautiful Mind) filmi qahramoni sifatida ko‘proq tanildi. Ushbu filmda matematikni aktyor Rassel Krou gavdalantirgan.