Qozog‘iston bosh vaziri o‘rinbosari Qanat Bozumbayev davlatlararo muvofiqlashtiruvchi suv xo‘jaligi komissiyasi yig‘ilishida Markaziy Osiyoda suv resurslarini adolatli taqsimlash zarurligini ta’kidladi.
Davlatlararo muvofiqlashtiruvchi suv xo‘jaligi komissiyasi transchegaraviy suv resurslarini strategik boshqarish bo‘yicha mintaqaning asosiy organi hisoblanadi. Navbatdagi yig‘ilish murakkab agroiqlimiy sharoit tufayli suvni adolatli taqsimlash masalalariga qaratildi.
“Bu shunchaki raqamlar emas, balki quyi oqimdagi suv ta’minoti uchun haqiqiy xavfdir. Afsuski, komissiya doirasida qabul qilingan qarorlar to‘liq bajarilmayapti”, dedi Bozumbayev.
U mintaqa davlatlari faqat bayonotlar bilan cheklanib qolmasdan, amaliy harakatlarga o‘tishi hamda suvdan foydalanishda hamkorlikni o‘zaro ishonch asosida rivojlantirish zarurligini aytdi.
“Birgalikdagi sa’y-harakatlar mamlakatlarimiz va butun mintaqa uchun sezilarli natijalar beradi”, deya qo‘shimcha qildi Qozog‘iston bosh vaziri o‘rinbosari.
Ma’lumot uchun, Qirg‘iziston va O‘zbekiston janubdagi sug‘orish taqchilligini bartaraf etish uchun Qozog‘istonga 600 million kub metr suv yuborishi rejalashtirilgan. Bozumbayevning aytishicha, bu borada Qirg‘iziston va O‘zbekiston vakillari bilan zarur muzokaralar o‘tkazilgan. Qozog‘istonga suv yetkazib berish jadvalida bir milliard kub metrdan ortiq orqada qolish holati ham qayd etilgan.
Bozumbayevning so‘zlariga ko‘ra, butun Markaziy Osiyoda bu yil qurg‘oqchil keldi. Turkiston va Qizilo‘rda viloyatlarini suv bilan ta’minlovchi Sirdaryoning asosiy o‘zaniga odatdagidan 30–40 foiz kam suv kelmoqda. Anomal issiqlik tufayli dehqonchilik ehtiyojlari ortgan, ammo mavjud suv hajmi yetarli emas.
Izoh (0)