Tojikiston Xitoyda o‘lim jazosiga hukm etilgan o‘z fuqarolarini vatanga qaytaradi. Bu haqda Tojikiston bosh prokurori Yusuf Rahmon ma’lum qildi, deya xabar bermoqda “Aziya-Plyus”.
Uning so‘zlariga ko‘ra, hozirgi vaqtda Xitoyda 16 nafar tojikistonlik jazoni o‘tamoqda, to‘rt nafar tojikistonlik esa Xitoy sudi tomonidan o‘lim jazosiga hukm qilingan.
Tojikiston va Xitoy o‘rtasida sudlanuvchilarni topshirish to‘g‘risidagi bitim ratifikatsiya qilingani munosabati bilan, Xitoyda sudlangan barcha tojikistonlik qarindoshlari hisobidan Tojikistonga qaytariladi va jazoni Tojikistonda o‘taydi.
Ayni vaqtda, Tojikiston qamoqxonalarida uch nafar Xitoy fuqarosi jazoni o‘tamoqda – ular noqonuniy narkotik aylanmasi, zo‘rlash va firibgarlik jinoyatlarida ayblanib, ozodlikdan mahrum etilgan.
Tojikiston bosh prokurorining qo‘shimcha qilishicha, hozirgi vaqtda 7,7 mingdan ortiq tojikistonlik Rossiya qamoqxonalarida jazoni o‘tamoqda. Dushanbe va Moskva o‘rtasida sudlanuvchilarni topshirish to‘g‘risida bitim bo‘lishiga qaramay, Tojikiston Rossiyada sudlangan barcha fuqarolarini vatanga qaytarish imkoniga ega emas.
Izoh (0)