Amerika Qo‘shma Shtatlari va Xitoy KXDRga nisbatan qo‘shimcha sanksiyalar kiritishni muhokama qilmoqda. Bu haqda AQSh davlat kotibi Jon Kerri Koreya Respublikasi TIV rahbari Yun Byon Se bilan Seulda kechgan uchrashuv chog‘ida aytib o‘tdi, deb xabar beradi “TASS”.
Kerrining so‘zlariga ko‘ra, Vashington yadro qurolidan xoli hududni yaratish evaziga ikki tomonlama munosabatlarni yaxshilash uchun Pxenyanga imkoniyat berdi. Ammo KXDR hatto muzokara o‘tkazish uchun belgilangan standartlarga ham yaqinlashmadi.
“Shu sababli AQSh va Xitoy sanksiyalarni kuchaytirish imkoniyatini muhokama qilyapti. Xitoy kuchli bosim o‘tkazish vositalariga ega”, — dedi bosh kotib.
“Xitoy vakillari bilan iyun oyida Vashingtonda iqtisodiyot va xavfsizlik masalalari bo‘yicha muzokara o‘tkazamiz. Ana o‘shanda biz muayyan tafsilotlarni gaplashib olamiz”, — dedi Kerri.
Pxenyan yadro va raketa sinovlarini o‘tkazganidan keyin KXDRga nisbatan BMT, AQSh va Yevroittifoq tomonidan bir qator cheklovlar kiritilgan edi.
Izoh (0)