Rossiya o‘z hududi orqali Afg‘onistonga harbiy texnika va qurollarni tranzit qilishni to‘xtatadi. Meduza.io’ning xabar berishicha, tegishli qaror Rossiya bosh vaziri Dmitriy Medvedev tomonidan imzolangan.
Qarorga asosan Rossiya Tashqi ishlar vazirligiga xorijiy mamlakatlar va xalqaro tashkilotlarni “Afg‘onistondagi Xavfsizlikni ta’minlashga ko‘maklashuvchi xalqaro kuchlarga Rossiya orqali qurollar, harbiy texnika va harbiy mulklarni tranzit qilish bekor qilingani” haqida xabardor qilish haqida ko‘rsatma berilgan.
“Interfaks” axborot agentligining qayd etishicha, Rossiya hukumatining ushbu qarori BMT Xavfsizlik kengashining 1386-rezolyutsiyasi talablarining amal qilishi to‘xtatilgani munosabati bilan qabul qilingan.
Afg‘onistondagi xalqaro koalitsiyaga yuklarni yetkazishda Rossiya hududidan tranzit sifatida foydalanish to‘g‘risidagi Rossiya va NATO o‘rtasida bitim 2008-yil aprelida imzolangan edi. Unga ko‘ra, yiliga 4,5 ming reys bilan Amerika yuklari Rossiyadan tranzit orqali Afg‘onistonga yetkazib berilishi kerak edi.
BMT Xavfsizlik kengashi tomonidan 2001-yil dekabrida qabul qilingan 1386-rezolyutsiya Afg‘onistonda Xavfsizlikni ta’minlashga ko‘maklashuvchi xalqaro kuchlarni tashkil etishga ruxsat bergan edi. Rezolyutsiyaning amal qilishi 2014-yil dekabrida tugadi. 2015-yildan boshlab xalqaro kuchlarning Afg‘onistonda turishi boshqa hujjatlar asosida tartibga solinmoqda.
Izoh (0)