Америка Қўшма Штатлари ва Хитой КХДРга нисбатан қўшимча санкциялар киритишни муҳокама қилмоқда. Бу ҳақда АҚШ давлат котиби Жон Керри Корея Республикаси ТИВ раҳбари Юн Бён Сэ билан Сеулда кечган учрашув чоғида айтиб ўтди, деб хабар беради ТАСС.
Керрининг сўзларига кўра, Вашингтон ядро қуролидан холи ҳудудни яратиш эвазига икки томонлама муносабатларни яхшилаш учун Пхеньянга имконият берди. Аммо КХДР ҳатто музокара ўтказиш учун белгиланган стандартларга ҳам яқинлашмади.
«Шу сабабли АҚШ ва Хитой санкцияларни кучайтириш имкониятини муҳокама қиляпти. Хитой кучли босим ўтказиш воситаларига эга», — деди бош котиб.
«Хитой вакиллари билан июнь ойида Вашингтонда иқтисодиёт ва хавфсизлик масалалари бўйича музокара ўтказамиз. Ана ўшанда биз муайян тафсилотларни гаплашиб оламиз», — деди Керри.
Пхеньян ядро ва ракета синовларини ўтказганидан кейин КХДРга нисбатан БМТ, АҚШ ва Евроиттифоқ томонидан бир қатор чекловлар киритилган эди.
Изоҳ (0)