Ногиронлар ҳақ-ҳуқуқлари бўйича конвенция ишлаб чиқаришга «оммабоп дизайн» деган тушунчани олиб кирди. Бу тушунча ҳар қандай ускунадан ҳам оддий одамлар, ҳам алоҳида эҳтиёжи бўлган одамлар бирдай, бемалол қўллана олиши талаби қўйилди. Юртимизда «оммабоп дизайн» масаласига ҳам, ногиронлар учун махсус анжомлар ишлаб чиқариш масаласига ҳам катта эътибор қаратилмоқда, деб ёзади Ўзбекистон Республикаси Меҳнат ва аҳолини ижтимоий муҳофаза қилиш вазирлиги ахборот хизмати.
Меҳнат ва аҳолини ижтимоий муҳофаза қилиш вазирлиги ва БМТ Taраққиёт дастури томонидан ногиронларнинг сифатли ва нисбатан арзон реабилитицион техникаларга бўлган эҳтиёжини қондириш масаласи ўрганиб чиқилди ва баъзи замонавий анжомларнинг намуналари сотиб олинди. Автомобиль эҳтиёт қисмлари, велосипед ва мототехника ишлаб чиқарувчи корхоналарнинг, реабилитация анжомларни ишлаб чиқаришга бўлган салоҳиятига мўлжалланган махсус семинар ҳам ўтказилди. Тадбирда уларга замонавий реабилитация техникалари ва уларнинг техник ҳужжатлари таништирилди. Семинарда ногиронлар ҳам иштирок этди ва махсус анжомларни ишлаб чиқаришда яна нималарга эътибор қаратиш лозимлиги ҳақида ўз фикрларини билдирди. Ишлаб чиқарувчилар намойиш этилган намуналар ва техник ҳужжатлардан келиб чиқиб, ногиронлар аравачалари, юриш мосламалари ва бошқа реабитация воситаларининг намуналарини яратиш устида иш бошлади.
Икки ой ўтар-ўтмас, ишлаб чиқарувчилар вазирликка маҳсулотларнинг илк лойиҳаларини тақдим этди. Меҳнат ва аҳолини ижтимоий муҳофаза қилиш вазирлиги ва БМТ Taраққиёт дастурининг «Ўзбекистонда ногиронлар ва ёлғиз кексаларга профессионал ижтимоий хизмат кўрсатиш» лойиҳаси мутахассислари ишлаб чиқарувчилар, ногиронлар масалалари бўйича мутахассислар ва ногиронлар ўртасида учрашув ташкил этди.
Ногиронларнинг эҳтиёжларини яхши англаган ҳолда, маҳсулотларнинг прототип нусхаларига баҳо берилди ва уларни янада мукаммаллаштириш бўйича тегишли тавсиялар айтиб ўтилди. Янги маҳсулотларнинг бу қадар пухта ва бамаслаҳат ишлаб чиқарилишидан келиб чиқиб, Made in Uzbekistan бренди остида тақдим этиладиган ушбу реабилитация анжомлари ҳам сифат жиҳатидан, ҳам нарх-навоси жиҳатидан анча талабчил ва ногиронларнинг корига яровчи маҳсулот бўлиши шубҳасиз. Ишлаб чиқариш янги иш ўринлари яратиш учун ҳам хизмат қилишини унутмаслик керак. Бу тадбирларнинг барчаси «Кексаларни қадрлаш ва эъзозлаш йили» Давлат дастури доирасида амалга оширилади.
Изоҳ (0)