Saudiya Arabistoni Yamandagi isyonchi-xusiylarga qarshi harbiy operatsiyani 12-may, seshanba kunidan to‘xtatadi. Bu haqda, Echo.msk.ru xabariga ko‘ra, Saudiya Arabistoni tashqi ishlar vaziri Odil al-Jubayr ma’lum qilgan.
“Biz 12-may, seshanba kuni soat 23:00dan operatsiyani to‘xtatishga qaror qildik. O‘t ochishni to‘xtatish tartibi besh kun davomida amalda bo‘ladi. Natijadan kelib chiqqan holda ushbu tartib yanada uzaytirilishi mumkin”, - dedi al-Jubayr.
Harbiy harakatlardagi ushbu tanaffusdan ko‘zlangan maqsad aholiga gumanitar yordam ko‘rsatishdan iborat. Saudiya Arabistoni TIV rahbarining so‘zlariga ko‘ra, sulh tartibining uzoq davom etishi xusiylar va ularning ittifoqchilariga bog‘liq.
“Bu xusiylar uchun, ular o‘z odamlari va Yaman xalqi haqida qayg‘urishlarini ko‘rsatish uchun bir imkoniyatdir”, - deya qo‘shimcha qildi Saudiya Arabistoni tashqi ishlar vaziri.
Izoh (0)