Қалбаки Pepsi ишлаб чиқарган наманганлик «тадбиркор»лар қўлга олинди

Наманган шаҳрида яшовчи ака-ука «тадбиркор»лар ўз юртдошларининг соғлиғидан кўра чўнтакларини қаппайтиришни ўйладилар, деб ёзади «Ҳуқуқ» газетаси.

Ёзнинг жазирамасида салқин ичимликлар савдоси билан шуғулланишни мақсад қилган ака-ука муқаддам судланган қўшниларини ўзларига шерик қилиб олди.

Улар Наманган шаҳридаги «Чорсу» бозоридан газли сув сотиш ускунаси харид қилди-да, ака-укаларнинг хонадонига ўрнатди. Қўлбола ичимлик тайёрлаш мақсадида учовлон шаҳардаги кафеларни айланиб, Pepsi ёрлиғи ёпиштирилган бўш елим идишларни йиғиштиришга киришди. Мўлжалдаги идишлар йиғилгач, газли сув, шакар ва сироп қўшиб, бир қарашда ҳақиқий Pepsi’дан фарқ қилмайдиган ичимлик тайёрлашди.

Уларнинг бозори тезда гуркираб кетди, бироқ бу хатти-ҳаракатлари ортидан кимларнингдир соғлиғига путур етаётганини ўйлашмасди.

Ҳар қандай қинғир иш ҳам бир кун фош бўлади. Таниш дўкончига 12 дона 0,5 ва 6 дона 1,5 литрли Pepsi ёрлиғи ёпиштирилган ва қалбакилаштирилган ичимликни 70 минг сўмга сотаётган устамонларнинг фаолиятига департаментнинг Наманган вилояти бошқармаси ходимлари томонидан чек қўйилди.

Тергов жараёни якунлангач, улар суд ҳукми билан тегишли жазоларини олди.