Xalqaro kosmik stansiyada ilk bor haqiqiy espresso qahva tayyorlandi

Qahva ichimligi koinotni zabt etmoqda. “TASS”ning xabar berishicha, Xalqaro kosmik stansiya (XKS) bortida italyancha espresso vaznsizlik holatida tayyorlandi va ichildi.

Bu jarayon yaqinda orbitaga olib chiqilgan muqobili yo‘q qahva tayyorlash mashinasi yordamida mumkin bo‘ldi. Qahva tayyorlash oddiy ishdek ko‘rinsa-da, koinotda buni amalga oshirish uchun maxsus ishlanmalar va ilg‘or texnologiyalari tatbiqi zarur bo‘ldi.

Qahva tayyorlaydigan mashina – italiyalik ilk astronavt ayol Samanta Kristoforetti tomonidan amalga oshirilayotgan “Futura” missiyasidagi ilmiy tadqiqotlar to‘plamining “mag‘zidir”.

Kristoforettining so‘zlariga ko‘ra, fazoviy espresso zichligi jihatdan ham, o‘tkirligi bo‘yicha ham, xushbo‘ylik borasida ham Italiyaning istalgan barida topish mumkin bo‘lgan espressoga o‘xshaydi. Qahvaga ekspeditsiyaning boshqa a’zolari – rossiyalik kosmonavtlar Gennadiy Padalka, Mixail Korniyenko, Anton Shkaplerov va amerikalik astronavt Skott Kelli va Terri Verst baho berdi.

XKSdagi qahva tayyorlaydigan mashina – faqat qahva ichish uchun fazoga olib chiqilmagan. Ushbu unikal qurilma suyuqliklarning vaznsizlik holatidagi harakati borasida yangi bilimlarni olish maqsadida o‘tkaziladigan tajribalarga ham xizmat qiladi.

Italiyada haqiqiy qahramon va eng mashhur ayolga aylangan Kristoforettining XKSdagi bir yarim yillik ekspeditsiyasi 14-may kuni yakuniga yetadi.