Қаҳва ичимлиги коинотни забт этмоқда. ТАССнинг хабар беришича, Халқаро космик станция (ХКС) бортида итальянча эспрессо вазнсизлик ҳолатида тайёрланди ва ичилди.
Бу жараён яқинда орбитага олиб чиқилган муқобили йўқ қаҳва тайёрлаш машинаси ёрдамида мумкин бўлди. Қаҳва тайёрлаш оддий ишдек кўринса-да, коинотда буни амалга ошириш учун махсус ишланмалар ва илғор технологиялари татбиқи зарур бўлди.
Қаҳва тайёрлайдиган машина – италиялик илк астронавт аёл Саманта Кристофоретти томонидан амалга оширилаётган «Футура» миссиясидаги илмий тадқиқотлар тўпламининг «мағзидир».
Кристофореттининг сўзларига кўра, фазовий эспрессо зичлиги жиҳатдан ҳам, ўткирлиги бўйича ҳам, хушбўйлик борасида ҳам Италиянинг исталган барида топиш мумкин бўлган эспрессога ўхшайди. Қаҳвага экспедициянинг бошқа аъзолари – россиялик космонавтлар Геннадий Падалка, Михаил Корниенко, Антон Шкаплеров ва америкалик астронавт Скотт Келли ва Терри Верст баҳо берди.
ХКСдаги қаҳва тайёрлайдиган машина – фақат қаҳва ичиш учун фазога олиб чиқилмаган. Ушбу уникал қурилма суюқликларнинг вазнсизлик ҳолатидаги ҳаракати борасида янги билимларни олиш мақсадида ўтказиладиган тажрибаларга ҳам хизмат қилади.
Италияда ҳақиқий қаҳрамон ва энг машҳур аёлга айланган Кристофореттининг ХКСдаги бир ярим йиллик экспедицияси 14 май куни якунига етади.
Изоҳ (0)