Indoneziya Avstraliyaning ikki fuqarosini qatl qiladi

Indoneziya ikki avstraliyalikka nisbatan o‘lim jazosini ijro etish niyatida ekanligini e’lon qildi. Bu haqda “Korrespondent.net” xabar bermoqda.

Tez orada qatl etilishi kerak bo‘lgan Endryu Chan va Muran Sukuraman 2005-yili boshqa yetti nafar avstraliyalik bilan birga Bali orolida hibsga olingan.

Indoneziya hukumati ma’lumotlariga ko‘ra, ushbu Avstraliya fuqarolari geroin giyohvandlik moddasini olib o‘tish va yetkazib berish bilan shug‘ullanishgan.

Sud qaroriga ko‘ra, Chan va Sukuraman o‘lim jazosiga, qolgan yetti nafar Avstraliya fuqarolari esa umrbod qamoq jazosiga hukm qilingan.

Avstraliya tomoni esa o‘z fuqarolariga nisbatan o‘lim jazosining ijro etilishiga mutlaqo qarshi chiqmoqda.

“Bizning nuqtai nazarimiz o‘zgargani yo‘q. Biz Indoneziya hukumatiga murojaat qilib, o‘lim jazosini ijro etmaslikka chaqiramiz. Biz giyohvand moddalar savdosi bilan shug‘ullanishni ma’qullamaymiz, biroq o‘lim jazosi ham avstraliyaliklar uchun nomaqbuldir”, - dedi Avstraliya bosh vaziri o‘rinbosari Uorren Trass.

Avvalroq, Indoneziyada o‘z fuqarolari qatl etilgani sabab, Gollandiya va Braziliya bu mamlakatdan o‘z elchilarini chaqirib olgandi.