Yevropa Ittifoqining yadroviy urushga tayyor bo‘lishi Rossiyani cheklab qo‘yish imkonini beradigan eng yaxshi vositadir. Bu bayonot Yevropaparlamentda Yevropa xalq partiyasi tomonidan tashkil etilgan majlisda ushbu partiya vakillari tomonidan aytib o‘tildi, deya xabar bermoqda “Segodnya.ua”.
“Rossiya bilan suhbat olib borish va uni ko‘ndirishga urinish davri tugadi. Endi haqiqiy amaliy siyosatni namoyish etish hamda mudofaa va xavfsizlik sohalarida diqqatni jamlash vaqti keldi, chunki Yevropa Ittifoqining sharqiy qanoti o‘zini xavf-xatar ostida his qilmoqda”, - dedi Yevropa xalq partiyasi prezidenti, yevrodeputat Yatsek Sariush-Volskiy.
Ruminiyalik yevrodeputat Kristian Den Predaning so‘zlariga ko‘ra, ruminlarning aksariyati Putin Dnestrbo‘yini Rossiyaga qo‘shib olmagunicha tinchimaydi, deb hisoblaydi. Yevrodeputat Roland Fryudenshteyn esa Yevropaning urushga tayyorligi hali hamon ochiq muhokama qilinmaganidan afsusdaligini bildirdi.
“Biz buni o‘zgartirishimiz, Yevropaning tamoyillari va kelajagi uchun urushga ham bora olishimizni ochiq tushuntirib qo‘yishimiz kerak”, - dedi Fryudenshteyn. Uning fikricha, Rossiya o‘zining xulqi nomunosib ekanligi va unga qarshilik ko‘rsatishlari mumkinligini anglab olishi kerak.
Yevropa xalq partiyasi Yevropa parlamentidagi eng yirik siyosiy guruh bo‘lib, aynan shu partiya Jan-Klod Yunker nomzodini Yevropa komissiyasi prezidentligi uchun ilgari surgan.
Avvalroq, Daniyaning Rossiyadagi elchisi Mixail Vanin, agar Daniya NATOning havo hujumidan mudofaa tizimiga qo‘shiladigan bo‘lsa, Rossiyaning ehtimoliy yadroviy hujumi nishoniga aylanishi mumkinligini qayd etib o‘tgandi.
Izoh (0)