Европа Иттифоқининг ядровий урушга тайёр бўлиши Россияни чеклаб қўйиш имконини берадиган энг яхши воситадир. Бу баёнот Европапарламентда Европа халқ партияси томонидан ташкил этилган мажлисда ушбу партия вакиллари томонидан айтиб ўтилди, дея хабар бермоқда «Сегодня.ua».
«Россия билан суҳбат олиб бориш ва уни кўндиришга уриниш даври тугади. Энди ҳақиқий амалий сиёсатни намойиш этиш ҳамда мудофаа ва хавфсизлик соҳаларида диққатни жамлаш вақти келди, чунки Европа Иттифоқининг шарқий қаноти ўзини хавф-хатар остида ҳис қилмоқда», - деди Европа халқ партияси президенти, евродепутат Яцек Сариуш-Волский.
Руминиялик евродепутат Кристиан Ден Преданинг сўзларига кўра, руминларнинг аксарияти Путин Днестрбўйини Россияга қўшиб олмагунича тинчимайди, деб ҳисоблайди. Евродепутат Роланд Фрюденштейн эса Европанинг урушга тайёрлиги ҳали ҳамон очиқ муҳокама қилинмаганидан афсусдалигини билдирди.
«Биз буни ўзгартиришимиз, Европанинг тамойиллари ва келажаги учун урушга ҳам бора олишимизни очиқ тушунтириб қўйишимиз керак», - деди Фрюденштейн. Унинг фикрича, Россия ўзининг хулқи номуносиб эканлиги ва унга қаршилик кўрсатишлари мумкинлигини англаб олиши керак.
Европа халқ партияси Европа парламентидаги энг йирик сиёсий гуруҳ бўлиб, айнан шу партия Жан-Клод Юнкер номзодини Европа комиссияси президентлиги учун илгари сурган.
Аввалроқ, Даниянинг Россиядаги элчиси Михаил Ванин, агар Дания НАТОнинг ҳаво ҳужумидан мудофаа тизимига қўшиладиган бўлса, Россиянинг эҳтимолий ядровий ҳужуми нишонига айланиши мумкинлигини қайд этиб ўтганди.
Изоҳ (0)