JARning eng yirik port shahri – Durbanda chet elliklarga tegishli do‘konlarni o‘marish va yoqib yuborish bilan davom etayotgan ommaviy tartibsizliklar natijasida besh kishi halok bo‘ldi. Bu haqda “TASS” xabar berdi.
Huquqni muhofaza qilish organlari vakillarining ma’lum qilishlaricha, halok bo‘lganlarning biri 14 yoshli o‘smir, ikki nafari Efiopiya fuqarosi, yana ikki nafari esa janubiy afrikalikdir.
Durbanning chekka tumanlarida boshlangan tartibsizliklar kun yarmiga kelib shahar markaziga ko‘chdi. 2 ming kishilik olomon pokistonliklarning do‘konlarini talon-taroj qilishga harakat qilganida politsiya rezina o‘qlar vositasida o‘t ochishga majbur bo‘ldi. Tartib posbonlariga javoban esa toshlar uloqtirildi, to‘xtab turgan mashinalardan biri yoqib yuborildi.
Afrikaning boshqa mamlakatlaridan kelgan 4 mingga yaqin muhojir esa shahar markazida hujumlarga qarshi norozilik namoyishini o‘tkazib, barrikada qurgan va uni yoqib yuborgan. Politsiya alangani suv otuvchi mashina yordamida o‘chirishga majbur bo‘ldi. Ayni vaqtda, mahalliy aholi hujumiga uchragan 150 nafar xorijlik shahar binolaridan biriga yashiringan. Mozambik, Kongo va Malavining bir necha ming fuqarosi politsiya tomonidan qo‘riqlanadigan Isipingo lageridan panoh topdi. Hozirgi vaqtda ham Durban markazida shovqinli granatalar portlashlari va politsiya sirenalari ovozi eshitilib turibdi.
JAR tashqi ishlar vaziri Malusi Gigabaning ma’lum qilishicha, mamlakat prezidenti Jeykob Zuma har ikki tomondagi odamlar hayotini mufohaza qilish va o‘z uylarini tashlab chiqqan muhojirlarni boshpana bilan ta’minlash haqida ko‘rsatma bergan. “Biz zo‘ravonlikni to‘xtatishimiz kerak”, - dedi u. Uning ma’lumotlariga ko‘ra, 48 kishi hibsga olingan. Politsiya ishlari bo‘yicha vazir Nati Nleko tartibni saqlash uchun shaharga armiya kiritilishi mumkinligi haqidagi xabarlarni rad etdi.
Qayd etishlaricha, zulular qiroli Gudvil Zvelitini “noqonuniy muhojirlar jomadonlarini yig‘ishtirib, uylariga yo‘qolishlari kerak”ligini ta’kidlaganidan so‘ng, zulularning Kvazulu-Natal viloyatida millatchilik to‘lqini ko‘tarilgan. Biroq olomonning harakatlari qonuniy faoliyat olib borayotgan muhojir biznesmenlarning faoliyatiga ham ta’sir qilgan. OAVning qayd etishicha, joriy tartibsizliklar 2008-yilgi to‘polonlarni yodga solmoqda – o‘shanda 60dan ortiq kishi halok bo‘lgandi. 2015-yil yanvarida Yoxannesburg chekkasidagi Souetoda ham shunday tartibsizliklar yuz bergan, 3 kishi qurbon bo‘lgandi.
Izoh (0)