ЖАРнинг энг йирик порт шаҳри – Дурбанда чет элликларга тегишли дўконларни ўмариш ва ёқиб юбориш билан давом этаётган оммавий тартибсизликлар натижасида беш киши ҳалок бўлди. Бу ҳақда ТАСС хабар берди.
Ҳуқуқни муҳофаза қилиш органлари вакилларининг маълум қилишларича, ҳалок бўлганларнинг бири 14 ёшли ўсмир, икки нафари Эфиопия фуқароси, яна икки нафари эса жанубий африкаликдир.
Дурбаннинг чекка туманларида бошланган тартибсизликлар кун ярмига келиб шаҳар марказига кўчди. 2 минг кишилик оломон покистонликларнинг дўконларини талон-тарож қилишга ҳаракат қилганида полиция резина ўқлар воситасида ўт очишга мажбур бўлди. Тартиб посбонларига жавобан эса тошлар улоқтирилди, тўхтаб турган машиналардан бири ёқиб юборилди.
Африканинг бошқа мамлакатларидан келган 4 мингга яқин муҳожир эса шаҳар марказида ҳужумларга қарши норозилик намойишини ўтказиб, баррикада қурган ва уни ёқиб юборган. Полиция алангани сув отувчи машина ёрдамида ўчиришга мажбур бўлди. Айни вақтда, маҳаллий аҳоли ҳужумига учраган 150 нафар хорижлик шаҳар биноларидан бирига яширинган. Мозамбик, Конго ва Малавининг бир неча минг фуқароси полиция томонидан қўриқланадиган Исипинго лагеридан паноҳ топди. Ҳозирги вақтда ҳам Дурбан марказида шовқинли гранаталар портлашлари ва полиция сиреналари овози эшитилиб турибди.
ЖАР ташқи ишлар вазири Малуси Гигабанинг маълум қилишича, мамлакат президенти Жейкоб Зума ҳар икки томондаги одамлар ҳаётини муфоҳаза қилиш ва ўз уйларини ташлаб чиққан муҳожирларни бошпана билан таъминлаш ҳақида кўрсатма берган. «Биз зўравонликни тўхтатишимиз керак», - деди у. Унинг маълумотларига кўра, 48 киши ҳибсга олинган. Полиция ишлари бўйича вазир Нати Нлеко тартибни сақлаш учун шаҳарга армия киритилиши мумкинлиги ҳақидаги хабарларни рад этди.
Қайд этишларича, зулулар қироли Гудвил Звелитини «ноқонуний муҳожирлар жомадонларини йиғиштириб, уйларига йўқолишлари керак»лигини таъкидлаганидан сўнг, зулуларнинг Квазулу-Наталь вилоятида миллатчилик тўлқини кўтарилган. Бироқ оломоннинг ҳаракатлари қонуний фаолият олиб бораётган муҳожир бизнесменларнинг фаолиятига ҳам таъсир қилган. ОАВнинг қайд этишича, жорий тартибсизликлар 2008 йилги тўполонларни ёдга солмоқда – ўшанда 60дан ортиқ киши ҳалок бўлганди. 2015 йил январида Йоханнесбург чеккасидаги Соуэтода ҳам шундай тартибсизликлар юз берган, 3 киши қурбон бўлганди.
Изоҳ (0)