Bag‘dod markazida amalga oshirilgan ikki portlash natijasida 8 kishi halok bo‘ldi, yana 30 kishi turli darajada tan jarohatlari oldi. Bu haqda “RIA Novosti” xabar bermoqda.
“Poytaxt markazidagi al-Karada ko‘chasida qoldirib ketilgan mashinaga o‘rnatilgan bomba portlashi natijasida uch kishi halok bo‘ldi, 12 kishi jarohatlandi”, - deya mahalliy politsiya zobitining so‘zlaridan iqtibos keltirmoqda “Al-Ahbor” gazetasi.
Iroq IIVdagi manbaning ma’lumotlariga ko‘ra, shahar markazidagi al-Mashahid tumanidagi ikkinchi portlashni “shahid kamari”ni taqib olgan terrorchi amalga oshirgan. Dastlabki ma’lumotlarga ko‘ra, 5 kishi halok bo‘lgan, 18 kishi yaralangan.
BMT tomonidan e’lon qilingan ma’lumotlarga ko‘ra, Iroqda mart oyida ro‘y bergan teraktlar va xunrezlik harakatlari oqibatida 997 kishi o‘ldirilgan va 2172 kishi jabrlangan. Halok bo‘lganlarning 729 nafari tinch aholi vakillaridir.
BMT ma’lumotlariga ko‘ra, Iroqdagi terrorchilik harakatlarining asosiy qismi Bag‘dod viloyatiga to‘g‘ri keladi – bu yerda o‘tgan bir oy davomida 362 kishi halok bo‘lib, 928 nafari jarohatlangan.
Izoh (0)