Бағдод марказида амалга оширилган икки портлаш натижасида 8 киши ҳалок бўлди, яна 30 киши турли даражада тан жароҳатлари олди. Бу ҳақда «РИА Новости» хабар бермоқда.
«Пойтахт марказидаги ал-Карада кўчасида қолдириб кетилган машинага ўрнатилган бомба портлаши натижасида уч киши ҳалок бўлди, 12 киши жароҳатланди», - дея маҳаллий полиция зобитининг сўзларидан иқтибос келтирмоқда «Ал-Аҳбор» газетаси.
Ироқ ИИВдаги манбанинг маълумотларига кўра, шаҳар марказидаги ал-Машаҳид туманидаги иккинчи портлашни «шаҳид камари»ни тақиб олган террорчи амалга оширган. Дастлабки маълумотларга кўра, 5 киши ҳалок бўлган, 18 киши яраланган.
БМТ томонидан эълон қилинган маълумотларга кўра, Ироқда март ойида рўй берган терактлар ва хунрезлик ҳаракатлари оқибатида 997 киши ўлдирилган ва 2172 киши жабрланган. Ҳалок бўлганларнинг 729 нафари тинч аҳоли вакилларидир.
БМТ маълумотларига кўра, Ироқдаги террорчилик ҳаракатларининг асосий қисми Бағдод вилоятига тўғри келади – бу ерда ўтган бир ой давомида 362 киши ҳалок бўлиб, 928 нафари жароҳатланган.
Изоҳ (0)