Maduro Venesuela va AQSH o‘rtasidagi munosabatlar tiklanishiga umid bildirdi

Venesuela prezidenti Nikolas Maduro AQSH bilan iliq aloqalar tiklanishiga umid bildirdi. “RIA Novosti” xabariga ko‘ra, Panamada davom etayotgan Amerika sammitida Maduro AQSH davlat kotibi maslahatchisi Tomas Shennon bilan uchrashgan.

“Unga, Venesuela qadri va suverenitetiga hurmat asosida, o‘zaro munosabatlarning yangi bosqichi eshiklari ochilishiga tilakdoshligimni aytdim”, - dedi Maduro.

Venesuela prezidenti Panamada o‘tayotgan sammit ikki qit’a mamlakatlari o‘rtasidagi yangi munosabatlar eshigini ochib berishiga umid bildirdi.

Bundan avvalroq, sammit doirasida Kuba tashqai ishlar vaziri va AQSH davlat kotibi o‘rtasida uchrashuv rejalashtirilgani haqida xabar berilgan edi – bu har ikkala mamlakat uchun so‘nggi 50 yillik tarixidagi eng muhim o‘zaro uchrashuv sifatida ko‘rilmoqda.

Sammit davomida AQSH prezidenti Barak Obama va Kuba yetakchisi Raul Kastro o‘rtasida muloqot o‘tkazilishi ehtimoli ham yo‘q emas.