Indoneziyalik 21 yoshli Mario Stevan Ambarita Garuda Indonesia aviakompaniyasiga tegishli reaktiv layner shassisining germetiklanmagan qismiga yashirinib, ming kilometr masofani uchib o‘tdi, deya xabar bermoqda InfoMedan.Net portali.
Pakanbarudan Jakartaga uchgan samolyotda “quyon” borligi, samolyot qo‘nganidan so‘ng, Mario Ambarita gandiraklab uchish-qo‘nish yo‘lagiga tushib kelganidan so‘ng ma’lum bo‘lgan – uni darhol qo‘lga olishgan.
Ambaratani dastlab shifoxonaga joylashtirishgan, chunki parvoz vaqtida unda kislorod yetishmovchiligi yuz bergan va u yengil jarohatlar olgandi, biroq uning hayotiga hech qanday xavf tahdid solmayotgani ma’lum bo‘lganidan so‘ng, uni politsiya hibsxonasiga o‘tkazishgan.
Xabar berilishicha, sarguzashttalab Mario Ambarita avialayner g‘ildiragi saqlanadigan qismga qanday qilib yashirinish mumkinligini internet orqali o‘rganib, bundan bir yil avval ham shu yo‘l bilan poytaxtga uchib kelishga harakat qilgan, biroq urinishi muvaffaqiyatsiz tugagan.
“Uning aytishicha, u Jokovi (Indoneziya prezidenti Joko Vidodo) bilan uchrashmoqchi bo‘lgan”, - dedi Jakarta aeroport rasmiylaridan biri.
Izoh (0)