Korrupsiya bilan bog‘liq shov-shuvli jinoiy ish sabab, Ispaniya qiroli Felipe VI, uning qarindoshlari, shuningdek, Ispaniya hukumatining sobiq va hozirgi a’zolari va boshqa yuqori martabali siyosatchilar sudga chaqirilishi mumkin. Bu haqda “RIA Novosti” xabar bermoqda.
Felipe VI’ning opasi – Kristinaning turmush o‘rtog‘i Inyaki Urdangaringa nisbatan 5,8 million yevroni talon-taroj qilganlik ayblovi bilan jinoyat ishi qo‘zg‘atilgan bo‘lib, Urdangarinning o‘zi Noos institutining xayriya tashkiloti rahbariyati tarkibiga kirgan.
Ayblovga ko‘ra, Urdangarin va uning hamkori – Diego Torres turli shaharlar va muxtor hamjamiyatlar (Balear orollari, Valensiya muxtor hamjamiyati, Madrid muxtor hamjamiyati) ma’muriyatlarini bir qator ishlarni bajarish bo‘yicha shu institut bilan bitim tuzishga ko‘ndirishgan, oqibatda kelishilgan ishlarning hech biri bajarilmagan.
Shundan so‘ng esa qilinmagan ishlar uchun to‘lovlar Urdangarin va Torresning hisob raqamlariga o‘tkazilgan. Ularga nisbatan hujjatlarni qalbakilashtirish, firibgarlik va davlat mablag‘larini talon-taroj qilish ayblovlari ilgari surilgan.
Chorshanba kuni Diego Torresning advokatlari ushbu jinoiy ish bo‘yicha qariyb 700 kishini guvoh sifatida chaqirmoqchi ekanliklarini ma’lum qilishdi – ular orasida qirol Felipe VI, uning ota-onasi Xuan Karlos va qirolicha Sofiya, opasi Yelena va uning sobiq turmush o‘rtog‘i Xayme de Marichalara, gersoginya Badaxoslik Pilar, Gretsiya va Daniya malikasi Irina va boshqalar bor.
Diego Torres advokatlarining da’vosiga ko‘ra, Ispaniya qirollik oilasi a’zolari Noos institutida olib borilgan firibgarlik ishlaridan yaxshi boxabar bo‘lgan. Diego Torresning o‘zi esa Qirollik uyini “oldindan ogohlantirmasdan turib hech qachon hech qanday ish qilmagani”ni ta’kidlamoqda.
Prokuratura Urdangarinni 19,5 yilga, “Toza qo‘llar” tashkilotini 26,5 yilga, Torresni esa 15,6 yilga ozodlikdan mahrum etishni so‘ramoqda.
Izoh (0)