Domodedovo aeroportida jasad solingan egasiz tobut topildi, deya xabar bermoqda “Vesti.ru” huquqni himoya qilish organlaridagi manbalariga tayanib. U Irkutskdan 24-mart kuni keltirilgan.
Yuk unga hamrohlik qilgan ayolga topshirilgan, biroq u tobutni aeroportning yuk terminalida qoldirib, yashiringan. Shundan so‘ng yuk aviatsiya xavfsizligi xizmati mutaxassislari tomonidan huquqni himoya qilish organlariga berilgan.
Aniqlanishicha, ayol rux tobut ichida o‘z o‘g‘li jasadini keltirgan. Erkak bir yil avval 35 yoshida vafot etgan. Uning jasadi mumiyolangan va hasharotlar tomonidan ancha zarar berilgan. Erkakning o‘limiga yurak faoliyatidagi yetishmovchilik sabab bo‘lgan. Biroq onasi, Irkutskda taniqli advokat, o‘g‘lini o‘ldirib ketishgan deb o‘ylab, jinoiy ish ochishni talab qildi. Ushbu o‘limda jinoyat belgilari bo‘lmagani sababli unga rad javobi berishdi.
Shunda 68 yoshli ayol o‘g‘lining jasadini go‘rdan kavlab olib, Moskvaga tiriltirish uchun olib kelishga qaror qiladi. Uchib kelgach, ayol hushini yo‘qotadi, aeroportda unga birinchi yordam ko‘rsatishadi. O‘ziga kelgach, ayol tobutni aeroportda qoldirib, Burdenko nomidagi kasalxonaga — shifokorlardan o‘g‘lini tiriltirishni so‘rash uchun jo‘nab ketadi.
Oxir-oqibat tobut morgga yuborildi, ayol esa davolash uchun ruhiy shifoxonaga jo‘natildi.
Izoh (0)