Fransiyaning Alp tog‘larida halokatga uchragan Airbus kapitani kabinaning berk eshigini bolta bilan urib ochmoqchi bo‘lgan. Bu haqda Bild nashri o‘z manbalariga tayanib xabar bermoqda, deb yozadi “Gazeta.ru”.

Manbalar so‘zlariga ko‘ra, birinchi uchuvchi bir necha marta kabinaga qaytib kirishga uringan, biroq u zirhli eshikni ocha olmagan.

Germanwings aviakompaniyasi matbuot kotibi bortda bolta bo‘lganligini tasdiqladi. Uning so‘zlariga ko‘ra, bolta “A320 xavfsizligini ta’minlash uchun zarur jihozning bir qismi bo‘lgan”.

Avvalroq Airbus A320 samolyotining ikkinchi uchuvchisi ataylab havo kemasi komandiriga kabina eshigini ochmagani ma’lum bo‘lgan edi. “Qora quti”dan olingan yozuvda uchuvchi qaytadan kabinaga kirmoqchi bo‘lgani, biroq buni uddalay olmaganini eshitish mumkin. Uchuvchi dastlab eshikni sekin taqillatgan, so‘ng qattiqroq urgan, shundan keyin esa eshikni urib sindirmoqchi bo‘lgan, biroq uddalay olmagan. Oxir-oqibat u kabinaga kira olmagan.

Eslatib o‘tamiz, 24-mart kuni Barselonadan Dyusseldorfga parvoz qilayotgan Airbus A320 samolyoti Fransiya janubida, Alp tog‘lari ustida halokatga uchrashi oqibatida layner bortida bo‘lgan 150 kishining barchasi halok bo‘lgan edi.