Joriy yilning 23-24-mart kunlari 9-sinf o‘quvchilari o‘rtasida umumta’lim fanlari bo‘yicha olimpiadaning III (viloyat) bosqichi bo‘lib o‘tdi, deb xabar beradi Xalq ta’limi vazirligi Axborot xizmati.
Mazkur fan olimpiadasida umumta’lim maktablarining 9-sinf o‘quvchilari 22 ta fandan o‘zaro bellashdi. Olimpiada bahslari 8 tilda bo‘lib o‘tdi va unda o‘quvchilar ikki bosqichda ishtirok etdi. Olimpiadaning maktab va tuman bosqichidan saralab kelingan o‘quvchilar 23-mart kuni yozma ishlarni topshirgan bo‘lsa, 24-mart kuni test sinovlarida qatnashdi.
Olimpiadaning mazkur bosqichida jami 6809 nafar o‘quvchi ishtirok etdi. Shuningdek, maxsus maktablarda ta’lim oluvchilar ona tili va adabiyoti hamda matematika fanlaridan qatnashdi.
Olimpiada natijalariga ko‘ra, jami 76-100 oralig‘ida ball olgan va sovrindor o‘rinlarni qo‘lga kiritgan o‘quvchilar akademik litseylar, kasb-hunar kollejlarining tegishli yo‘nalishlariga imtiyozli ravishda qabul qilinadi.
Fan olimpiadasining haqqoniy o‘tkazilishi uchun tashkiliy qo‘mita tomonidan savollarning ko‘p variantlilik asosida maxfiyligi ta’minlandi. Olimpiada bo‘lib o‘tadigan xonalarda xolis ishtirokchilar va ota-onalar vakillari ishtirok etishi belgilandi.
Ma’lumot uchun, Respublikadagi umumta’lim maktablari 9-sinfida 482 ming 220 nafar o‘quvchi tahsil olmoqda.
Izoh (0)