Жорий йилнинг 23-24 март кунлари 9-синф ўқувчилари ўртасида умумтаълим фанлари бўйича олимпиаданинг III (вилоят) босқичи бўлиб ўтди, деб хабар беради Халқ таълими вазирлиги Ахборот хизмати.

Мазкур фан олимпиадасида умумтаълим мактабларининг 9-синф ўқувчилари 22 та фандан ўзаро беллашди. Олимпиада баҳслари 8 тилда бўлиб ўтди ва унда ўқувчилар икки босқичда иштирок этди. Олимпиаданинг мактаб ва туман босқичидан саралаб келинган ўқувчилар 23 март куни ёзма ишларни топширган бўлса, 24 март куни тест синовларида қатнашди.

Олимпиаданинг мазкур босқичида жами 6809 нафар ўқувчи иштирок этди. Шунингдек, махсус мактабларда таълим олувчилар она тили ва адабиёти ҳамда математика фанларидан қатнашди.

Олимпиада натижаларига кўра, жами 76-100 оралиғида балл олган ва совриндор ўринларни қўлга киритган ўқувчилар академик лицейлар, касб-ҳунар коллежларининг тегишли йўналишларига имтиёзли равишда қабул қилинади.

Фан олимпиадасининг ҳаққоний ўтказилиши учун ташкилий қўмита томонидан саволларнинг кўп вариантлилик асосида махфийлиги таъминланди. Олимпиада бўлиб ўтадиган хоналарда холис иштирокчилар ва ота-оналар вакиллари иштирок этиши белгиланди.

Маълумот учун, Республикадаги умумтаълим мактаблари 9-синфида 482 минг 220 нафар ўқувчи  таҳсил олмоқда.