Jurnalist Facebook ustida tajriba o‘tkazish uchun o‘z o‘limini sahnalashtirdi

Jurnalist Jo Vey Facebook’da eksperiment o‘tkazib, ijtimoiy tarmoqda marhumlar uchun “xotira” sahifasini ochish mexanizmini sinab ko‘rmoqchi bo‘ldi, deya xabar bermoqda Meduza. Buning uchun u mavjud bo‘lmagan akasi Gribo Vey va o‘z ismi ostida ikkita soxta akkaunt ochdi.

Ularni bir-birining do‘stlari safiga qo‘shib qo‘ydi va “akasi”ning akkauntini o‘z akkaunti uchun merosxo‘r sifatida ko‘rsatdi: Facebook qoidalari bo‘yicha “merosxo‘r”lar o‘limi tasdiqlangach, marhumning profili ustidan nazoratni qo‘lga kiritadi.

Bir kuni u o‘zining soxta akkauntida ertasi kuni dirijablda sayohat qilishi haqida xabar qoldirdi. Shundan so‘ng grafik redaktor yordamida gazeta rasmini yasab, unga dirijablda halokatga uchrab vafot etgani haqidagi xabarni kiritdi.

Bir necha kundan so‘ng “akasi”ning akkauntidan Facebook’ga o‘z vafoti haqida xabarnoma jo‘natdi va dalil sifatida gazeta rasmini ilova qildi. Ertasi kuni Facebook moderatori arizani ko‘rib chiqdi va “akasi”ga “marhum”ning sahifasi ustidan nazoratni topshirdi.

“Bu bema’ni tajriba Facebook’da o‘z o‘limingizni sahnalashtirishning qanchalik oson ekanligini ko‘rsatadi”, — dedi Jo Vey.