Журналист Жо Вей Facebook’да эксперимент ўтказиб, ижтимоий тармоқда марҳумлар учун «хотира» саҳифасини очиш механизмини синаб кўрмоқчи бўлди, дея хабар бермоқда Meduza. Бунинг учун у мавжуд бўлмаган акаси Грибо Вей ва ўз исми остида иккита сохта аккаунт очди.
Уларни бир-бирининг дўстлари сафига қўшиб қўйди ва «акаси»нинг аккаунтини ўз аккаунти учун меросхўр сифатида кўрсатди: Facebook қоидалари бўйича «меросхўр»лар ўлими тасдиқлангач, марҳумнинг профили устидан назоратни қўлга киритади.
Бир куни у ўзининг сохта аккаунтида эртаси куни дирижаблда саёҳат қилиши ҳақида хабар қолдирди. Шундан сўнг график редактор ёрдамида газета расмини ясаб, унга дирижаблда ҳалокатга учраб вафот этгани ҳақидаги хабарни киритди.
Бир неча кундан сўнг «акаси»нинг аккаунтидан Facebook’га ўз вафоти ҳақида хабарнома жўнатди ва далил сифатида газета расмини илова қилди. Эртаси куни Facebook модератори аризани кўриб чиқди ва «акаси»га «марҳум»нинг саҳифаси устидан назоратни топширди.
«Бу бемаъни тажриба Facebook’да ўз ўлимингизни саҳналаштиришнинг қанчалик осон эканлигини кўрсатади», — деди Жо Вей.
Изоҳ (0)