Rossiya Mudofaa vazirligi o‘z rasmiy saytiga Ikkinchi jahon urushiga bog‘liq 15 ta noyob, maxfiy va tarixiy hujjatlarni joylashtirdi. Ularning orasida Polsha hududida joylashgan Osvensim “o‘lim lagerlari” majmuasini ozod qilish bilan bog‘liq hujjatlar ham mavjud.
Jumladan, ushbu harakatlarda qatnashgan 1-Ukraina frontining 60-armiyasi milliy tarkibi haqidagi ma’lumot keltirilgan bo‘lib, unda jami 39 millat sanab o‘tilgan. Milliy tarkib bo‘yicha ruslar (42398 nafar) va ukrainlar (38041) yaqqol yetakchilik qilgan bo‘lsa, keyingi o‘rinlarda beloruslar (1210), tatarlar (1088), yahudiylar (1073), o‘zbeklar (838), qozoqlar (701), gruzinlar (555), armanlar (534) va polyaklar (434) ko‘rsatilgan.
Ushbu hujjatlar 21-yanvar kuni Polsha tashqi ishlar vaziri Gjegoj Sxetinning Osvensimni ukrainlar ozod qilgani haqidagi gaplaridan keyin oshkor qilingan.
Ma’lumot uchun, 1940−1945-yillarda faoliyat ko‘rsatgan Osvensim (nemischa nomi Aushvits-Birkenau) lagerida rasmiy ma’lumotlarga ko‘ra 1,4 million kishi halok bo‘lgan, ulardan 1,1 millionga yaqini yahudiylar bo‘lgan. Lagerni ozod qilishda 1 va 4-Ukraina frontlarining kuchlari qatnashgan. Urush paytida frontlarga millat bo‘yicha emas, balki ularning harakatlanish hududiga qarab nom berilgani qayd etilgan.
Izoh (0)