Россия Мудофаа вазирлиги ўз расмий сайтига Иккинчи жаҳон урушига боғлиқ 15 та ноёб, махфий ва тарихий ҳужжатларни жойлаштирди. Уларнинг орасида Польша ҳудудида жойлашган Освенцим «ўлим лагерлари» мажмуасини озод қилиш билан боғлиқ ҳужжатлар ҳам мавжуд.
Жумладан, ушбу ҳаракатларда қатнашган 1-Украина фронтининг 60-армияси миллий таркиби ҳақидаги маълумот келтирилган бўлиб, унда жами 39 миллат санаб ўтилган. Миллий таркиб бўйича руслар (42398 нафар) ва украинлар (38041) яққол етакчилик қилган бўлса, кейинги ўринларда белоруслар (1210), татарлар (1088), яҳудийлар (1073), ўзбеклар (838), қозоқлар (701), грузинлар (555), арманлар (534) ва поляклар (434) кўрсатилган.
Ушбу ҳужжатлар 21 январь куни Польша ташқи ишлар вазири Гжегож Схетиннинг Освенцимни украинлар озод қилгани ҳақидаги гапларидан кейин ошкор қилинган.
Маълумот учун, 1940−1945 йилларда фаолият кўрсатган Освенцим (немисча номи Аушвиц-Биркенау) лагерида расмий маълумотларга кўра 1,4 миллион киши ҳалок бўлган, улардан 1,1 миллионга яқини яҳудийлар бўлган. Лагерьни озод қилишда 1 ва 4-Украина фронтларининг кучлари қатнашган. Уруш пайтида фронтларга миллат бўйича эмас, балки уларнинг ҳаракатланиш ҳудудига қараб ном берилгани қайд этилган.
Изоҳ (0)