Domodedovo shahar sudi 2010-yilda Domodedovo aeroportiga qo‘nish chog‘ida parchalanib ketgan Tu-154M samolyoti uchuvchisi – Zakarji Zakarjayevga amnistiya berib, jazodan ozod qildi. Bu haqda “TASS” xabar berdi.
2010-yil 4-dekabrda Zakarjayev, “Dog‘iston avialiniyasi” OAJga qarashli texnik jihatdan soz holatda bo‘lgan Tu-154M samolyotini boshqargan holda, Vnukovo (Moskva) aeroportidan Uytosh (Maxachqal’a) aeroportiga uchadi.
Ekipaj tarkibida komandir bilan birga yana yetti kishi, bortda esa 163 nafar yo‘lovchi bo‘lgan. Parvozdan 29 daqiqa o‘tib, Moskva vaqti bilan 14:36 da, samolyot Domodedovo aeroporti uchish-qo‘nish yo‘lagidan tashqariga qo‘nadi va uchish maydonidagi to‘siqqa urilib, parchalanadi. Oqibatda 2 yo‘lovchi halok bo‘ladi, yana 6 yo‘lovchi va 2 nafar ekipaj a’zosi jiddiy jarohat oladi, jami 70 dan ortiq kishi jabr ko‘radi.
Tergov va sud tomonidan belgilanganidek, aviahodisaning bevosita sababi havo kemasi komandiri Zakarjayev tomonidan Tu-154M parvoz boshqaruvi qo‘llanmasining “Qo‘nishga tayyorgarlik va ikki ishlamayotgan dvigatel bilan qo‘nish” bo‘limida belgilab qo‘yilgan shartlarning buzilishi hisoblanadi. Bu umumiy uchish-texnika ekspertizasi tomonidan tasdiqlangan.
Izoh (0)