O‘zbekiston milliy terma jamoasi Avstraliyada bo‘lib o‘tayotgan Osiyo kubogining guruh bosqichi birinchi turida KXDR terma jamoasidan minimal hisobda ustun keldi.
Ikkinchi bo‘lim birinchisidan farqli kechdi. Birinchi bo‘lim vaqtida Sidneyda boshlangan yomg‘ir bu vaqtga kelib ancha shiddatli ko‘rinish olgan edi. O‘zbekiston terma jamoasi ikkinchi bo‘limni qator hujumlar bilan boshladi. O‘z navbatida, KXDR ham birinchi bo‘limdagidan ko‘ra ancha faollashdi.
62-daqiqada o‘yin taqdirini hal qilgan vaziyat sodir bo‘ldi. Terma jamoamiz sardori Server Jeparov chap qanotdan to‘pni jarima maydonchasi ichiga yetkazib berdi. Raqib himoyachilari o‘rtasida paydo bo‘lgan Igor Sergeyev baland sakrab, to‘pni Ri Myong Guk darvozasining chap burchagiga joylab qo‘ydi. 1:0.
Goldan keyin o‘yin yana jonlandi. Goh O‘zbekiston, goh KXDR futbolchilari hujumlar uyushtirib turdi. Umuman olganda esa O‘zbekiston o‘yin oxirigacha ustunlik ko‘rsatib turdi. Hakam tomonidan qo‘shib berilgan so‘nggi daqiqada O‘zbekiston terma jamoasi darvozasi oldida eng xavfli vaziyat kuzatildi. Koreyalik futbolchining boshi bilan yo‘llagan zarbasini Nesterov darvoza chizig‘i ustida qaytarib qoldi.
Shu tariqa O‘zbekiston terma jamoasi Osiyo kubogini g‘alaba bilan boshladi. Keyingi o‘yin 14-yanvar soat 14:00 da Xitoy terma jamoasiga qarshi bo‘lib o‘tadi.
Izoh (0)