Ўзбекистон миллий терма жамоаси Австралияда бўлиб ўтаётган Осиё кубогининг гуруҳ босқичи биринчи турида КХДР терма жамоасидан минимал ҳисобда устун келди.
Иккинчи бўлим биринчисидан фарқли кечди. Биринчи бўлим вақтида Сиднейда бошланган ёмғир бу вақтга келиб анча шиддатли кўриниш олган эди. Ўзбекистон терма жамоаси иккинчи бўлимни қатор ҳужумлар билан бошлади. Ўз навбатида, КХДР ҳам биринчи бўлимдагидан кўра анча фаоллашди.
62-дақиқада ўйин тақдирини ҳал қилган вазият содир бўлди. Терма жамоамиз сардори Сервер Жепаров чап қанотдан тўпни жарима майдончаси ичига етказиб берди. Рақиб ҳимоячилари ўртасида пайдо бўлган Игорь Сергеев баланд сакраб, тўпни Ри Мёнг Гук дарвозасининг чап бурчагига жойлаб қўйди. 1:0.
Голдан кейин ўйин яна жонланди. Гоҳ Ўзбекистон, гоҳ КХДР футболчилари ҳужумлар уюштириб турди. Умуман олганда эса Ўзбекистон ўйин охиригача устунлик кўрсатиб турди. Ҳакам томонидан қўшиб берилган сўнгги дақиқада Ўзбекистон терма жамоаси дарвозаси олдида энг хавфли вазият кузатилди. Кореялик футболчининг боши билан йўллаган зарбасини Нестеров дарвоза чизиғи устида қайтариб қолди.
Шу тариқа Ўзбекистон терма жамоаси Осиё кубогини ғалаба билан бошлади. Кейинги ўйин 14 январь соат 14:00 да Хитой терма жамоасига қарши бўлиб ўтади.
Изоҳ (0)