Bugungi taomnomada — olma va quruq mevalar bilan pishirilgan tovuq
Zarur masalliqlar:
- 1 ta tovuq
- 100 g mayonez
- 10 g xantal (gorchitsa)
- 200 g olma
- 100 g turshak
- 100 g olxo‘ri qoqi
- tuz
- murch
- 10 g kashnich
- 100 g o‘simlik yog‘i
- 1 metr pergament qog‘ozi
Tayyorlanishi:
1. Butun tovuqni olib, ustiga 100 g mayonez quyamiz.
2. Ta’bga ko‘ra tuz va murch sepamiz.
3. 15 g kashnich solamiz.
4. Ustiga 10 g xantalni qo‘shamiz.
5. So‘ng 100 g o‘simlik yog‘ini solamiz.
6. Va barchasini tovuqning ustiga surtib chiqamiz.
7. Tovuqni marinadlash uchun ushbu holida kechasi bilan sovitgichda qoldiramiz.
8. Ikkinchi kuni uni olib, pishirish uchun tayyorlaymiz. Buning uchun avval 200 g olmani po‘stidan tozalab, o‘rtacha kattalikdagi bo‘laklarga bo‘lamiz.
9. Uni 100 grammdan turshak va olxo‘ri qoqi bilan birgalikda tovuqning ichiga solamiz.
10. So‘ng tovuqni ip bilan o‘rab chiqamiz.
11. Va 1 metrlik pergament qog‘oziga o‘raymiz.
12. Tovuqni 220 darajagacha qizdirilgan duxovkada 30 daqiqa davomida pishiramiz. 30 daqiqadan so‘ng tovuqni pergament qog‘ozidan chiqarib, yuzasi qizarishi uchun yana 15 daqiqa duxovkada qoldiramiz.
13. Usti qizarib pishgach, tovuqni duxovkadan olib, likopga solamiz va didimizga qarab bezatamiz.
Taom tayyor. Yoqimli ishtaha!
Ushbu taomni tayyorlashda foydalanilgan mahsulotlarni Korzinka.uz supermarketlaridan xarid qilishingiz mumkin.
Ularning narxlari bilan quyidagi jadvalda tanishishingiz mumkin. Narxlar 8-dekabr holatiga keltirilgan.
Rukn homiysi — Korzinka.uz supermarketlar tarmog‘i.
Taomni tayyorlashda bergan ko‘magi uchun Toshkentdagi RomAntica restorani va shaxsan bosh oshpaz Shuhrat Islomovga minnatdorchilik bildiramiz.
Ruknimizning keyingi sonlarida oshqovoq va brokkolili rostbif hamda seld balig‘i bilan “Shuba” salatini tayyorlaymiz.
Izoh (0)