Assalomu alaykum, “Daryo” o‘quvchilari. Mening ismim Rinata. Men rinata.uz sayti pazandalik bo’yicha bloggeri va muallifiman. Endilikda har juma kuni sizlarni italyan, fransuz va boshqa millat taomlarining oddiy va mazali retseptlari bilan tanishtirib boraman. Mazali va foydali ovqat tarafdori sifatida mashhur retseptlarni uy sharoitida qanday qilib ko‘p vaqt, mablag‘ va kuch sarflamay tayyorlashni so‘zlab beraman. Agar sizlarda savollar tug‘ilsa, qoldiring, ularga bajonidil javob beraman. Keling, birgalikda ishga kirishamiz!
Kabachki solingan shokolodli maffin
Maffin nima ekan, deb o‘ylayotgan bo‘lsangiz, darhol unga aniqlik kiritamiz. Maffinlar – kam portsiyali kichik kekslar bo‘lib, an’anaviy kekslardan masalliqlarni aralashtirish uslubi bilan farq qiladi. Masalan, keks uchun odatda saryog‘ va tuxumni ko‘pirtirib olamiz. Maffinlar uchun esa bu qorishma birgina qoshiq yordamida tayyorlanadi, ya’ni mikser yoki blender shart emas. Maffinlar uchun zarur narsa bu – alyumin, temir yoki teflondan yasalgan kichik qoliplardir. Qoliplarga tayyor masalliqni quyishdan avval, yog‘lab va unlab olish (alyumin qolipdan tashqari) yoki do‘konlarda sotiladigan maxsus qog‘oz qoliplarni solish kerak. Tayyor maffinlar kekslar kabi g‘ovakli va shishgan bo‘lmaydi. Maffinlar pishirish jarayonida ko‘tariladi-yu, yuzasi yorilmaydi. Maffinlarning kekslardan ajralib turuvchi asosiy farqi, ularga turli xil meva, yong‘oq va shokolad bo‘laklarini solish mumkin. Bugun sizlarga kabachki solib tayyorlanadigan maffinlarni taklif qilaman.
Zarur masalliqlar:
- 2 dona tuxum
- 200 g (1 ta o‘rtacha) kabachka
- 1,75 stakan (250 g) un
- 1 stakan kefir
- 2/3 stakan shakar
- 100 ml o‘simlik yog‘i
- 0,5 stakan kakao
- 1 siqim yong‘oq mag‘zi
- 2 choy qoshiq yumshatgich (razrixlitel)
Masalliqlarning taxminiy narxi 7 000 so‘m. Ulardan 10-12 dona maffin tayyor bo‘ladi.
Tayyorlanishi:
1. Kabachkilarni yuvamiz va kub shaklida maydalab kesamiz. 1 osh qoshiq shakar solib, 10 daqiqaga, suvi chiqquncha tindirib qo‘yamiz.
2. Yong‘oqlarni maydalab, olib qo‘yamiz. Boshqa idishda tuxum, o‘simlik yog‘i va kefirni aralashtiramiz.
3. Aralashmaga barcha quruq masalliqlarni solib, aralashtiramiz. Oxirida yong‘oq va suvi siqib tashlangan kabachkilarni ham qo‘shamiz.
4. Qoliplarni yo‘glab olamiz yoki qog‘oz qoliplarni solamiz va har birining ¾ qismini xamir bilan to‘ldiramiz.
200 darajagacha qizdirilgan duxovkada 20—25 daqiqa davomida pishirib olamiz. Pishgan-pishmaganligini odatdagidek gugurt cho‘pi yordamida aniqlaymiz. Sovugach, qolipdan ajratib, ajoyib ta’mdan bahra olamiz. Agar sifatli kakao ishlatilsa, shokolad ta’mi yanada to‘yimli bo‘ladi.
Shokoladli maffin tayyor. Yoqimli ishtaha!
Izoh (0)