“Bunyodkor” klubi sobiq himoyachisi Sergey Simonenko o‘z vaqtida maosh va mukofot pullarini olmagani uchun klub ustidan FIFAga shikoyat xati yozganini ma’lum qildi, deb xabar bermoqda “Uff.uz”.
“Uzoq yillik futbolchilik faoliyatim davomida birinchi marta klub bilan bunday muammo kelib chiqdi.
Men uchun ko‘ngilsizliklar ‘Bunyodkor’dan Mirjalol Qosimov ketgach boshlandi. Mirjalol Qosimov mening o‘yinim va tayyorgarligimdan qanoatlanardi va muntazam ravishda asosiy tarkibda maydonga tushirardi. Uning qo‘l ostida Osiyo Chempionlar ligasi va O‘zbekiston chempionatidagi muhim o‘yinlarda asosiy tarkibda o‘ynadim. Ammo Mirjalol Qo‘shoqovich jamoadan ketgach, yangi bosh murabbiy Lushan darhol boshqa futbolchilarni tarkibga jalb etishni istadi. Biroq bu vaqtga kelib jamoa byudjeti yangi futbolсhilar sotib olish imkoniyatini bermas edi.
Shu tariqa men kerakmas o‘yinchiga aylandim. Meni ro‘yxatdan chiqarib yuborib, o‘rinbosarlar tarkibiga o‘tkazishdi. Men esa faqat bir narsani — o‘ynashni va mashg‘ulot o‘tashni istardim. Biz klub rahbariyati bilan muzokara olib borishga harakat qilib ko‘rdik, ammo samarasiz. Ularning maqsadi butkul boshqa edi. Natijada men va oilam aziyat chekdik. Chunki besh oy davomida shartnomada ko‘rsatilgan maosh va mukofot pullarini olmadim.
Bu borada FIFAga tegishli hujjatlar va shikoyat xatini yo‘llaganman. Men adolat qaror topishini istayman. Shartnomam 1-dekabrda yakuniga yetgan va men siniq arava qarshisida qolib ketdim. Hozir na yetarli o‘yin amaliyoti va na tegishli pulga egaman.
Lushan kelgach, ‘Bunyodkor’ chempionatda to‘rtinchi o‘rinni egalladi va O‘zbekiston Kubogi finalida ham mag‘lubiyatga uchradi. Demak u murabbiy sifatida Mirjalol Qosimov davrida qo‘lga kiritilgan yutuqlarni saqlab qola olmadi. Shunday ekan, ishonch bilan aytish mumkin — Lushan mavsumni butkul boy berdi. Uning murabbiylik ishidagi natijasi uchun yig‘lasa arziydi.
Men esa futbolchilik faoliyatimni yakunlashni istamayman va yuqori saviyada o‘ynashni istayman. Hozir yangi jamoa qidirish bilan bandman”, — dedi futbolchi.
Eslatib o‘tamiz, Sergey Simonenko 2014-yilning yanvar oyida “Bunyodkor” bilan shartnoma imzolagan edi. Klubdagi faoliyati davomida 14 ta o‘yinda maydonga tushgan va O‘zbekiston Superkubogida g‘alabaga erishgan. Simonenko o‘tkazgan rasmiy uchrashuvlarning yarmi Osiyo Chempionlar ligasiga to‘g‘ri keladi. U “Bunyodkor” tarkibida bitta gol kiritishga muvaffaq bo‘lgan.
Izoh (0)