«Бунёдкор»нинг собиқ ҳимоячиси клуб устидан ФИФАга шикоят қилганини маълум қилди

«Бунёдкор» клуби собиқ ҳимоячиси Сергей Симоненко ўз вақтида маош ва мукофот пулларини олмагани учун клуб устидан ФИФАга шикоят хати ёзганини маълум қилди, деб хабар бермоқда «Uff.uz».

«Узоқ йиллик футболчилик фаолиятим давомида биринчи марта клуб билан бундай муаммо келиб чиқди.

Мен учун кўнгилсизликлар ‘Бунёдкор’дан Миржалол Қосимов кетгач бошланди. Миржалол Қосимов менинг ўйиним ва тайёргарлигимдан қаноатланарди ва мунтазам равишда асосий таркибда майдонга туширарди. Унинг қўл остида Осиё Чемпионлар лигаси ва Ўзбекистон чемпионатидаги муҳим ўйинларда асосий таркибда ўйнадим. Аммо Миржалол Қўшоқович жамоадан кетгач, янги бош мураббий Лушан дарҳол бошқа футболчиларни таркибга жалб этишни истади. Бироқ бу вақтга келиб жамоа бюджети янги футболчилар сотиб олиш имкониятини бермас эди.

Шу тариқа мен керакмас ўйинчига айландим. Мени рўйхатдан чиқариб юбориб, ўринбосарлар таркибига ўтказишди. Мен эса фақат бир нарсани — ўйнашни ва машғулот ўташни истардим. Биз клуб раҳбарияти билан музокара олиб боришга ҳаракат қилиб кўрдик, аммо самарасиз. Уларнинг мақсади буткул бошқа эди. Натижада мен ва оилам азият чекдик. Чунки беш ой давомида шартномада кўрсатилган маош ва мукофот пулларини олмадим.

Бу борада ФИФАга тегишли ҳужжатлар ва шикоят хатини йўллаганман. Мен адолат қарор топишини истайман. Шартномам 1 декабрда якунига етган ва мен синиқ арава қаршисида қолиб кетдим. Ҳозир на етарли ўйин амалиёти ва на тегишли пулга эгаман.

Лушан келгач, ‘Бунёдкор’ чемпионатда тўртинчи ўринни эгаллади ва Ўзбекистон Кубоги финалида ҳам мағлубиятга учради. Демак у мураббий сифатида Миржалол Қосимов даврида қўлга киритилган ютуқларни сақлаб қола олмади. Шундай экан, ишонч билан айтиш мумкин — Лушан мавсумни буткул бой берди. Унинг мураббийлик ишидаги натижаси учун йиғласа арзийди.

Мен эса футболчилик фаолиятимни якунлашни истамайман ва юқори савияда ўйнашни истайман. Ҳозир янги жамоа қидириш билан бандман», — деди футболчи.

Эслатиб ўтамиз, Сергей Симоненко 2014 йилнинг январь ойида «Бунёдкор» билан шартнома имзолаган эди. Клубдаги фаолияти давомида 14 та ўйинда майдонга тушган ва Ўзбекистон Суперкубогида ғалабага эришган. Симоненко ўтказган расмий учрашувларнинг ярми Осиё Чемпионлар лигасига тўғри келади. У «Бунёдкор» таркибида битта гол киритишга муваффақ бўлган.