Yoz mavsumida jazirama tufayli ko‘pchilik yopiq binoda yoki mashinada uzoq vaqt qolishga majbur bo‘ladi, bu esa barcha uchun og‘ir sinovdir. Zamonaviy texnologiyalar tufayli issiqqa qarshi kurashish usullari mavjud va bunda konditsioner yordamga keladi.
Salqin havo oqimi ostida bo‘lish, albatta, jazirama issiqdan aziyat chekishdan ko‘ra yaxshiroqdir, biroq konditsioner ostida uzoq vaqt qolish sog‘liqqa salbiy ta’sir ko‘rsatadi, odatda yengil shaklda, masalan, mushaklar yallig‘lanishi, sinusit, gaymorit va jiddiyroq kasallik — legionellyozga ham olib kelishi mumkin.
Legionellyoz nima va nima uchun shunday nomlanadi? Bu havo-chang va havo-tomchi yo‘li bilan yuqadigan yuqumli kasallikdir. Qo‘zg‘atuvchi (legionella) tabiiy muhitda, masalan, suv havzalarida, tuproqda yashaydi va odam uchun xavf tug‘dirmaydi.
Biroq legionella ventilyatsiya shaxtalari, konditsionerlar, basseynlar yoki jakuzi kabi sun’iy muhitda ham keng tarqalgan bo‘lib, legionellyoz bilan kasallanish xavfini oshiradi va shuning uchun u texnogen infeksiyalar qatoriga kiradi.
Bu kasallik oddiy pnevmoniyaga qaraganda ancha og‘ir kechadi, bundan tashqari, legionellyoz oshqozon-ichak trakti, yurak va buyraklar bilan bog‘liq muammolar bilan ham namoyon bo‘lishi mumkin.
Kasallikning og‘ir holati ko‘pincha nafas yetishmovchiligi va sepsis kabi asoratlarga olib keladi. Shuningdek, kasallikning kechishini bir qator omillar, masalan, immunitetning pasayishi, chekish va xavfli o‘smalar og‘irlashtiradi. Statistikaga ko‘ra, erkaklar ayollarga qaraganda kasallikka ko‘proq moyil. Legionellyozga qarshi vaksina mavjud emas.
Kasallikka o‘z vaqtida yoki erta tashxis qo‘yilib, davo choralari ko‘rilsa, bemor 7-10 kunda sog‘ayib ketadi.
Legionellyozning oldini olish uchun konditsioner tizimini o‘z vaqtida tozalash — filtrlarni almashtirish, antibakterial ishlov berish, shuningdek, ishlayotgan konditsioner ostida uzoq vaqt qolmaslik kerak.
Izoh (0)