“Vodiygazta’minot” unitar korxonasi tuman filialining aholiga suyultirilgan gaz ballonlari yetkazib berish ahvoli o‘rganilganda, talaygina qonunbuzilishiga yo‘l qo‘yilganligi aniqlandi, deb xabar bermoqda “Huquq” gazetasi.
Ma’lum bo‘lishicha, “Vodiygazta’minot” unitar korxonasining Beshariq tuman filiali tomonidan 2013-yil va joriy yilning o‘rganilgan vaqti mobaynida 10 va 20 kilogrammli gaz ballonlarida aholiga jami 587 ming 980 kilogramm suyultirilgan gaz yetkazib berilgan.
Ushbu jarayonda gaz ballonlarini aholiga sotishdan tushgan jami 285 mln. 787 ming so‘mdan ziyod naqd pul mablag‘i Vazirlar Mahkamasining “Fiskal xotiraga ega bo‘lgan nazorat-kassa mashinalarining qo‘llanishini yanada takomillashtirishga oid qo‘shimcha chora-tadbirlar to‘g‘risida”gi Qarori talablariga zid ravishda nazorat-kassa mashinasidan o‘tkazilmasdan, Davlat soliq xizmatidan ro‘yxatdan o‘tmagan chiptalar (kvitansiyalar) orqali kirim qilinib, “Milliy bank” Beshariq tuman filialiga topshirilganligi aniqlandi.
Shuningdek, filialning ekspeditori A. G‘aniyevning talabi bilan suyultirilgan gaz ballonlarini o‘rnatuvchi usta va haydovchilar aholiga to‘ldirilgan ballonlarni belgilanganiga nisbatan qimmat narxlarda sotishgan. 2013-yil va 2014-yilning o‘rganilgan vaqti mobaynida to‘ldirilgan gaz ballonlarini belgilanganiga nisbatan qimmat narxlarda sotishdan tushgan jami 8 mln. 200 ming so‘mdan ziyod naqd pul mablag‘i bank muassasasiga topshirilmasdan, turli ehtiyojlar uchun sarflab kelingan.
Mazkur holatlar yuzasidan “Vodiygazta’minot” unitar korxonasining Beshariq tuman filiali mansabdor shaxslari tegishli jinoiy javobgarlikka tortildilar. Yetkazilgan zarar undirildi.
Izoh (0)