Фарғонада тўлдирилган газ баллонларини белгиланганидан қиммат нархда сотишдан тушган 8 миллион сўмдан ортиқ маблағ банкка топширилмагани аниқланди

«Водийгазтаъминот» унитар корхонаси туман филиалининг аҳолига суюлтирилган газ баллонлари етказиб бериш аҳволи ўрганилганда, талайгина қонунбузилишига йўл қўйилганлиги аниқланди, деб хабар бермоқда «Ҳуқуқ» газетаси.

Маълум бўлишича, «Водийгазтаъминот» унитар корхонасининг Бешариқ туман филиали томонидан 2013 йил ва жорий йилнинг ўрганилган вақти мобайнида 10 ва 20 килограммли газ баллонларида аҳолига жами 587 минг 980 килограмм суюлтирилган газ етказиб берилган.

Ушбу жараёнда газ баллонларини аҳолига сотишдан тушган жами 285 млн. 787 минг сўмдан зиёд нақд пул маблағи Вазирлар Маҳкамасининг «Фискал хотирага эга бўлган назорат-касса машиналарининг қўлланишини янада такомиллаштиришга оид қўшимча чора-тадбирлар тўғрисида»ги Қарори талабларига зид равишда назорат-касса машинасидан ўтказилмасдан, Давлат солиқ хизматидан рўйхатдан ўтмаган чипталар (квитанциялар) орқали кирим қилиниб, «Миллий банк» Бешариқ туман филиалига топширилганлиги аниқланди.

Шунингдек, филиалнинг экспедитори А. Ғаниевнинг талаби билан суюлтирилган газ баллонларини ўрнатувчи уста ва ҳайдовчилар аҳолига тўлдирилган баллонларни белгиланганига нисбатан қиммат нархларда сотишган. 2013 йил ва 2014 йилнинг ўрганилган вақти мобайнида тўлдирилган газ баллонларини белгиланганига нисбатан қиммат нархларда сотишдан тушган жами 8 млн. 200 минг сўмдан зиёд нақд пул маблағи банк муассасасига топширилмасдан, турли эҳтиёжлар учун сарфлаб келинган.

Мазкур ҳолатлар юзасидан «Водийгазтаъминот» унитар корхонасининг Бешариқ туман филиали мансабдор шахслари тегишли жиноий жавобгарликка тортилдилар. Етказилган зарар ундирилди.