Uskunalarni yetkazib berish, gazni qayta ishlash zavodi kompleksini qurish va Qandim konlari guruhini obodonlashtirish uchun pudratchini tanlash bo‘yicha tanlov savdolarida Hyundai Engineering Co., Ltd. (Koreya Respublikasi) kompaniyasi boshchiligidagi konsorsium g‘olib bo‘ldi. Bu haqda O‘zbekiston Prezidenti Islom Karimov tomonidan imzolangan Lukoil Overseas Uzbekistan Ltd. kompaniyasi bilan mahsulotni taqsimlash to‘g‘risidagi bitimni amalga oshirishni davom ettirishga oid qo‘shimcha chora-tadbirlar to‘g‘risidagi qaror (pdf)da aytiladi.
Hujjatda ta’kidlanishicha, Lukoil Uzbekistan Operating Company MChJ operatori tomonidan loyiha obyektlarini qurish bo‘yicha texnik-iqtisodiy asoslar va ishchi hujjatlar belgilangan tartibda ishlab chiqilmoqda.
O‘zbekiston rahbari “O‘zbekneftgaz” MXK hamda Lukoil Overseas Uzbekistan Ltd. kompaniyasining Hyundai Engineering Co., Ltd. kompaniyasi bilan Lukoil Uzbekistan Operating Company MChJ o‘rtasida uskunalar yetkazib berish, gazni qayta ishlash zavodi kompleksini qurish va Qandim konlari guruhini obodonlashtirish to‘g‘risida barcha ishlarni tayyor holda topshirish sharti bilan, umumiy qiymati 2 662 million dollarlik shartnomani tuzish taklifini ma’qulladi.
Qarorda 2018-yil 1-iyuligacha Qandim gazni qayta ishlash zavodining birinchi navbati ishga tushirilishi aytiladi. Shuningdek, Islom Karimov Qandim konlari guruhi uchastkasi, Xauzak va Shodi uchastkalari, shuningdek Qo‘ng‘irot uchastkasiga oid mahsulotni taqsimlash to‘g‘risidagi bitimning amal qilish muddatini 7 yilga uzaytirdi.
Izoh (0)