Ускуналарни етказиб бериш, газни қайта ишлаш заводи комплексини қуриш ва Қандим конлари гуруҳини ободонлаштириш учун пудратчини танлаш бўйича танлов савдоларида Hyundai Engineering Cо., Ltd. (Корея Республикаси) компанияси бошчилигидаги консорциум ғолиб бўлди. Бу ҳақда Ўзбекистон Президенти Ислом Каримов томонидан имзоланган Lukoil Overseas Uzbekistan Ltd. компанияси билан маҳсулотни тақсимлаш тўғрисидаги битимни амалга оширишни давом эттиришга оид қўшимча чора-тадбирлар тўғрисидаги қарор (pdf)да айтилади.
Ҳужжатда таъкидланишича, Lukoil Uzbekistan Operating Company МЧЖ оператори томонидан лойиҳа объектларини қуриш бўйича техник-иқтисодий асослар ва ишчи ҳужжатлар белгиланган тартибда ишлаб чиқилмоқда.
Ўзбекистон раҳбари «Ўзбекнефтгаз» МХК ҳамда Lukoil Overseas Uzbekistan Ltd. компаниясининг Hyundai Engineering Cо., Ltd. компанияси билан Lukoil Uzbekistan Operating Company МЧЖ ўртасида ускуналар етказиб бериш, газни қайта ишлаш заводи комплексини қуриш ва Қандим конлари гуруҳини ободонлаштириш тўғрисида барча ишларни тайёр ҳолда топшириш шарти билан, умумий қиймати 2 662 миллион долларлик шартномани тузиш таклифини маъқуллади.
Қарорда 2018 йил 1 июлигача Қандим газни қайта ишлаш заводининг биринчи навбати ишга туширилиши айтилади. Шунингдек, Ислом Каримов Қандим конлари гуруҳи участкаси, Хаузак ва Шоди участкалари, шунингдек Қўнғирот участкасига оид маҳсулотни тақсимлаш тўғрисидаги битимнинг амал қилиш муддатини 7 йилга узайтирди.
Изоҳ (0)