Britaniyaning afsonaviy Pink Floyd guruhi o‘zining The Endless River (“Bepoyon daryo”) xayrlashuv albomidagi Louder than Words (“So‘zlardan-da yangroq”) qo‘shig‘iga Orol dengizi muammolariga bag‘ishlangan klip suratga oldi. Bu haqda Gazeta.uz xabar bermoqda. Klipning promo-roligi 11-noyabr kuni guruhning YouTube’dagi kanalida e’lon qilindi.
Klip rejissori Obri Pauell nashrga bergan intervyusida Orol muammosiga murojaat qilishining sabablari hamda nima uchun klipni O‘zbekistonda suratga olmaganiga to‘xtalib o‘tdi (suratga olish ishlari Qozog‘istonda bo‘lib o‘tdi).
“Klipdan ko‘zlangan asosiy maqsad ekologik xabardorlikni oshirishdir, — dedi Pauell. — U Orol dengizining go‘zalligi haqida faqat ota-onasi, bobo-buvilari orqaligina biladigan yosh avlod haqida hikoya qiladi”.
Britaniyalik rejissorning aytishicha, ular dastlab klipni O‘zbekistonda suratga olmoqchi bo‘lgan. Biroq bu yerda ularni ishlashga chaqirish uchun zarur litsenziyaga ega mahalliy kinokompaniyalar bo‘lmagan.
“O‘zbekistonda suratga olish uchun zarur ruxsatnomani qo‘lga kiritishga ko‘p vaqt ketishini bilgach, Qozog‘istonga murojaat qildik”, — dedi Pauell syomka jarayoni O‘zbekistonga kechmaganini vaqtlari tig‘iz bo‘lgani bilan izohlar ekan.
Manzaradan olgan taassurotlari bilan bo‘lishar ekan, rejissor Orol dengizi atrofida baliqchilik xo‘jaliklaridan yodgorlik bo‘lib qolgan kemalarning temir-tersak sifatida bo‘laklanayotganini afsus bilan tilga oldi. “Bu kemalar yosh avlodga bu yerlarda baliqchilik gullab-yashnaganini eslatib turuvchi yagona dalillardir, ular o‘z joyida qolishi kerak”, — dedi u.
“Hozirda Qozog‘istonda ham, O‘zbekistonda ham Orolni suv bilan to‘ldirish bo‘yicha tadbirlar ko‘rilmoqda. Bu oxirida amalga oshishiga ishonishni xohlardim. Klipning yakuni ham shunday umidni ifodalaydi — eski kemalar atrofida suv ko‘tarilib boradi”, — deya ta’kidladi rejissor.
Izoh (0)