Британиянинг афсонавий Pink Floyd гуруҳи ўзининг The Endless River («Бепоён дарё») хайрлашув альбомидаги Louder than Words («Сўзлардан-да янгроқ») қўшиғига Орол денгизи муаммоларига бағишланган клип суратга олди. Бу ҳақда Gazeta.uz хабар бермоқда. Клипнинг промо-ролиги 11 ноябрь куни гуруҳнинг YouTube’даги каналида эълон қилинди.
Клип режиссёри Обри Пауэлл нашрга берган интервьюсида Орол муаммосига мурожаат қилишининг сабаблари ҳамда нима учун клипни Ўзбекистонда суратга олмаганига тўхталиб ўтди (суратга олиш ишлари Қозоғистонда бўлиб ўтди).
«Клипдан кўзланган асосий мақсад экологик хабардорликни оширишдир, — деди Пауэлл. — У Орол денгизининг гўзаллиги ҳақида фақат ота-онаси, бобо-бувилари орқалигина биладиган ёш авлод ҳақида ҳикоя қилади».
Британиялик режиссёрнинг айтишича, улар дастлаб клипни Ўзбекистонда суратга олмоқчи бўлган. Бироқ бу ерда уларни ишлашга чақириш учун зарур лицензияга эга маҳаллий кинокомпаниялар бўлмаган.
«Ўзбекистонда суратга олиш учун зарур рухсатномани қўлга киритишга кўп вақт кетишини билгач, Қозоғистонга мурожаат қилдик», — деди Пауэлл съёмка жараёни Ўзбекистонга кечмаганини вақтлари тиғиз бўлгани билан изоҳлар экан.
Манзарадан олган таассуротлари билан бўлишар экан, режиссёр Орол денгизи атрофида балиқчилик хўжаликларидан ёдгорлик бўлиб қолган кемаларнинг темир-терсак сифатида бўлакланаётганини афсус билан тилга олди. «Бу кемалар ёш авлодга бу ерларда балиқчилик гуллаб-яшнаганини эслатиб турувчи ягона далиллардир, улар ўз жойида қолиши керак», — деди у.
«Ҳозирда Қозоғистонда ҳам, Ўзбекистонда ҳам Оролни сув билан тўлдириш бўйича тадбирлар кўрилмоқда. Бу охирида амалга ошишига ишонишни хоҳлардим. Клипнинг якуни ҳам шундай умидни ифодалайди — эски кемалар атрофида сув кўтарилиб боради», — дея таъкидлади режиссёр.
Изоҳ (0)