6-noyabr kuni AQShning Ayova shtati Logan shahri sudida 18 yoshli o‘smir Kodi Metsker-Medsen o‘zining besh yoshli tutingan ukasi Dominik Elkinsni goblin deb xayol qilib o‘ldirib qo‘yganini aytdi. Bu haqda “TASS” xabar bermoqda.
Fojia 2013-yil avgustida aka-ukalar hovlida o‘ynab yurganida sodir bo‘lgan. Aka to‘satdan qo‘liga g‘isht olib, ukasini ura boshlagan, so‘ng uni daryoga cho‘ktirgan.
Metsker-Medsenning sudda aytishicha, u tez-tez tasavvuridagi dunyoga tushib qoladi va ommabop Skylanders video‘yini ta’sirida gallyutsinatsiyalarni his qiladi. Jinoyat sodir qilish vaqtida o‘smir o‘z ukasini emas, “jirkanch yashil goblinni” o‘ldirayotganiga ishonchi komil bo‘lgan.
Elkins va Metsker-Medsen biologik qarindoshlar emas, ularning har ikkalasi ham ota-onasi qaramog‘isiz qolgan va bitta oilaga tarbiya qilish uchun berilgan. Metsker-Medsen yetti yoshligida uning onasi ota-onalik huquqidan mahrum qlingan. U sudda homiladorlik vaqtida narkotiklar iste’mol qilganini va o‘g‘lining bolaligida ko‘plab “xayoliy do‘stlari” bo‘lganini aytgan edi.
Metsker-Medsen ayni paytda turmaning bir kishilik kamerasida saqlanmoqda. Uning advokati o‘smir jinoyatni sodir etish paytida ongsiz holda bo‘lganini ta’kidlamoqda.
Goblin — G‘arbiy Yevropa mifologiyasiga ko‘ra, yer osti g‘orlarida yashovchi va quyosh nurlariga chidam bera olmaydigan g‘ayritabiiy odamsimon mavjudot.
Izoh (0)