29-oktabr, chorshanba kuni Latviya chegarasida NATO qiruvchi samolyotlari Rossiyaning yettita harbiy samolyotlarini tutib qoldi. Bu hodisa bir sutka ichida ikkinchisi bo‘ldi. Bu haqda Latviya mudofaa vazirligi Twitter-akkauntida xabar berildi.
Boltiqbo‘yidagi bazada joylashgan F-16 samolyotlari dastlab ikkita Su-24 qiruvchi-bombardimonchilarni, keyinroq esa ikkita Su-24, ikkita MiG-31 qiruvchi-tutuvchilari va bitta Su-27 qiruvchidan iborat samolyotlar guruhini tutib qoldi. Bayonotda aytilishicha, bir kun avval shunga o‘xshash voqea kuzatilib, yettita Rossiya samolyotlari NATO qiruvchilari tomonidan tutib qolingan edi.
Latviya idorasidagilarning ta’kidlashicha, Rossiya samolyotlari NATO havo hududiga buzib kirmagan. NATO matbuot xizmati alyans aviatsiyasi so‘nggi ikki kun ichida Boltiq, Shimoliy va Qora dengiz hududlarida parvozlarni amalga oshirgan Rossiya samolyotlarini tutib qolish uchun to‘rt marta safarbar qilinganini qayd etdi. Rossiya Mudofaa vazirligi esa bunday bayonotlarga hech qanday izoh berganicha yo‘q.
Izoh (0)