Italiya politsiyasi Lugo shahrida bir necha o‘nlab bemorlar qotili sifatida gumon qilinayotgan tibbiy xizmat xodimasini hibsga oldi. Dastlabki ma’lumotlarga ko‘ra, hamshira uning g‘ashini keltirgan qariyalarni nobud qilgan. Bu haqda Korrespondent.net xabar bermoqda.
Shifoxonaning 39 nafar bemori vafotiga aloqador bo‘lishi mumkin bo‘lgan 42 yoshli Daniela Podjialiga jinoiy javobgarlik tahdid qilmoqda. Tergovchilar versiyasiga ko‘ra, bemorlarga o‘limga olib keluvchi kaliy inyeksiyasi yuborilgan.
Tergov ishlari 8-aprelda Lugodagi tibbiyot muassasasiga davolanish uchun yotqizilgan, kasalligi nisbatan xavfsiz deb topilgan 78 yoshli Roza Kalderonining o‘limidan so‘ng boshlangan.
Sud tibbiy ekspertiza marhumaning qon tarkibida yurak urishini to‘xtatuvchi kaliy xloridining katta miqdordagi dozasi borligini ko‘rsatdi.
2014-yilning birinchi choragi bo‘yicha shifoxona arxivini ko‘rib chiqqandan so‘ng, tergovchilar, xuddi shunday g‘alati vaziyatda 38 nafar bemor vafot etganligini aniqlagan. Ma’lum qilinishicha, bemorlarning aksariyat qismini Daniela parvarish qilgan.
Biroq, Danielaning boshqa o‘limlarga aloqadorligini isbotlash ancha qiyin kechadi, chunki qon tarkibida kaliyning mavjudligini ko‘rsatuvchi belgilar ikki kun mobaynida yo‘q bo‘lib ketadi.
Izoh (0)